Die letscht Woche hemer am Zischtig ide volle Mehrzweckhalle dörfe ösen Olympiamedalliegwönner Alex Baumann empfange. S’Schötzechörli, d’Musig, e Darbüütig vom TV und zum krönende Abschluss hend au mer no 3 Lieder zum Beschte geh… De Alex isch so beiidrockt gse, das er grad is „unpassend“ (Dorfnarre führed kei Gwändli fö so muskulösi Manne) Guggengwändli gschloffe isch. Mer hend nähmlich usegfonde, das Bobfahrer und Dorfnarre sehr viel gmeinsams hend. Alex fö nöchscht Johr, dömer gern es passends Gwändli ahfertige fö di! 🙂

Am Samschtig hemer den im no völlnere Saal dörfe spiele. Wie immer isches en geniale Uftrett gse. Am 24.00 Uhr hemer den mitem Obergugger of sin Geburtstag ahgstosse. Drom heter den au immerwieder dörfe e Schnäpsli trinke. Nomol alles Gueti fö Zuekunft, liebe Erich.

Nochere me, oder weniger lange Nacht sömer am 11ii am Sonntig au wieder parat gse fö öses traditionell Frühschoppenkonzert vorem Museum. Au det sönd en hufe Lüüt debii gse! Mer hend ganz treue Fans. 🙂 Am 4ii isches den wiiter gange mitem Kindermaskenball. Mer het gse, dases gnueg Guggennochwuchs het. Zu guter Letzt hemer de Böög no uf de letschte Reis begleitet.

Am Mentigobed hemer de krönend Abschluss gha vom Stääner Maskenball. Das Johr isches echli speziell, ösi Guggensaison isch nähmlich no nüd fertig. Mer gsiet ös am Guggentreffe d’Savognin no…..